ນະຄອນຫຼວງວຽງຈັນ, 19 ພະຈິກ 2021, ກະຊວງອຸດສາຫະກຳ ແລະ ການຄ້າ (ອຄ) ໄດ້ຈັດກອງປະຊຸມປຶກສາຫາລືເພື່ອລະດົມຄວາມຄິດເຫັນ ແລະ ສົນທະນາກ່ຽວກັບປະສົບການ ໃນການຈັດຕັ້ງປະຕິບັດຕົວຈິງຂອງກົດໝາຍສະບັບປັບປຸງ 2013 ເພື່ອປະກອບສ່ວນເຂົ້າໃນການປັບປຸງ ກົດໝາຍວ່າດ້ວຍວິສາຫະກິດສະບັບດັ່ງກ່າວ. ກອງປະຊຸມໄດ້ຈັດຂຶ້ນທີ່ຫ້ອງປະຊຸມໃຫຍ່, ກະຊວງອຸດສາຫະກຳ ແລະ ການຄ້າ ພາຍໃຕ້ການເປັນປະທານຂອງ ທ່ານ ບຸນເຖິງ ດວງສະຫວັນ ຮອງລັດຖະມົນຕີ, ກະຊວງ ອຄ ແລະ ປະທານຮ່ວມໂດຍ ທ່ານ ປອ. ໄຊບັນດິດ ຣາຊະພົນ, ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ. ກອງປະຊຸມດັ່ງກ່າວມີຜູ້ເຂົ້າຮ່ວມທັງໝົດ 50 ທ່ານ ຈາກກົມທະບຽນ ແລະ ຄຸ້ມຄອງວິສາຫະກິດ, ກອງເລຂາປັບປຸງກົດໝາຍວິສາຫະກິດ (2013), ຜູ້ຕາງໜ້າຈາກສະພາການຄ້າ ແລະ ອຸດສາຫະກຳ ແຫ່ງຊາດລາວ, ຫົວໜ່ວຍວິສາຫະກິດຕ່າງໆ, ທະນາຄານທຸລະກິດ ແລະ ບໍລິສັດທີ່ປຶກສາກົດໝາຍ.
ໃນພິທີເປີດກອງປະຊຸມ, ທ່ານ ບຸນເຖິງ ໄດ້ກ່າວຈຸດປະສົງຂອງກອງປະຊຸມ ແລະ ແຜນຂອງການປັບປຸງກົດໝາຍວ່າດ້ວຍວິສາຫະກິດ ເຊິ່ງຄາດວ່າຈະນຳເອົາເຂົ້າຜ່ານ ໃນກອງປະຊຸມສະໄໝສາມັນເທື່ອທີ່ 4 ຂອງສະພາແຫ່ງຊາດຊຸດທີ IX ໃນທ້າຍປີ 2022. ໃນໂອກາດນີ້, ທ່ານຍັງໄດ້ເນັ້ນວ່າການປັບປຸງກົດໝາຍແມ່ນຕ້ອງໄດ້ໃຫ້ສອດຄ່ອງກັບກົດໝາຍ, ລະບຽບການທີ່ກ່ຽວຂ້ອງ, ໂດຍສະເພາະແມ່ນນິຕິກຳໃນຂົງເຂດເສດຖະກິດ ແລະ ແບບວິທີປະຕິບັດຂອງສາກົນ. ດັ່ງນັ້ນ, ຈໍາເປັນຕ້ອງມີການປະເມີນເຖິງຜົນດີ ແລະ ຜົນເສຍຂອງການຈັດຕັ້ງປະຕິບັດກົດໝາຍສະບັບປັດຈຸບັນອີກ.
ທ່ານ ປອ. ໄຊບັນດິດ ໄດ້ສະແດງຄວາມຊົມເຊີຍມາຍັງກະຊວງ ອຄ ຕໍ່ກັບຄວາມພະຍາມໃນການປັບປຸງລະບຽບ ການຕ່າງໆທີ່ຕິດພັນກັບການດຳເນີນທຸລະກິດມາໂດຍຕະຫຼອດ, ເພື່ອອຳນວຍຄວາມສະດວກ ແລະ ຫຼຸດເວລາໃນການຂຶ້ນທະບຽນວິສາຫະກິດ. ເຖິງຢ່າງໃດກໍຕາມ, ກະຊວງ ອຄ ຍັງຕ້ອງສືບຕໍ່ຮ່ວມມືກັບຫຼາຍພາກສ່ວນເພື່ອລະດົມຄວາມຄິດ ແລະ ແກ້ໄຂຂໍ້ຫຍຸ້ງຍາກໃນການຂຶ້ນທະບຽນວິສາຫະກິດເພື່ອດຶງດູດການລົງທຶນ, ໂດຍປັບປຸງສະພາບແວດລ້ອມການດຳເນີນທຸລະກິດ ແລະ ບັນຍາກາດການລົງທຶນ ໃນ ສປປ ລາວ.
ກອງປະຊຸມໄດ້ຮັບຟັງຄຳເຫັນ ແລະ ຂໍ້ສະເໜີແນະໃນການປັບປຸງກົດໝາຍວິສາຫະກິດ ສະບັບປີ 2013 ຈາກບັນດາຜູ້ເຂົ້າຮ່ວມຈາກພາກສ່ວນຕ່າງໆ, ໂດຍສະເພາະຜູ້ຕາງໜ້າຈາກພາກທຸລະກິດ, ເປັນຕົ້ນແມ່ນຄຳເຫັນທີ່ຕິດພັນກັບການຫຼຸດຂັ້ນຕອນຂອງການຂໍຂຶ້ນທະບຽນວິສາຫະກິດ, ການປັບປຸງຄຳສັບຈຳນວນໜຶ່ງ, ການພິຈາລະນາກ່ຽວກັບກົດລະບຽບພາຍໃນຂອງວິສາຫະກິດ, ການນຳໃຊ້ລາຍເຊັນເອເລັກໂຕນິກ, ບັນຫາທີ່ຕິດພັນກັບຂັ້ນຕອນລະຫວ່າງກົມທະບຽນ ແລະ ຄຸ້ມຂອງວິສາຫະກິດ ແລະ ກົມສ່ວຍສາອາກອນ ພາຍຫຼັງການຂຶ້ນທະບຽນວິສາຫະກິດ, ມາດຕະການລົງໂທດ, ການຍຸບເລີກ ແລະ ການຢຸດເຊົາຂອງວິສາຫະກິດ ແລະ ບັນຫາອື່ນໆ.
ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າຂອງ ສປປ ລາວ (LCT) ເປັນໂຄງການທີ່ຈັດຕັ້ງປະຕິບັດພາຍໃຕ້ ກົມແຜນການ ແລະ ການຮ່ວມມື, ກະຊວງ ອຸດສາຫະກໍາ ແລະ ການຄ້າ, ໂດຍໄດ້ຮັບການປະກອບທຶນຮ່ວມເຂົ້າກອງທຶນສົບທົບຫຼາຍຝ່າຍໂດຍທະນາຄານໂລກ, ລັດຖະບານອົດສະຕຣາລີ, ລັດຖະບານ ໄອແລນ ແລະ ລັດຖະບານ ອາເມຣິກາ, ເຊິ່ງເປົ້າໝາຍຫຼັກແມ່ນການຫຼຸດຜ່ອນ ແລະ ລົບລ້າງອຸປະສັກທີ່ມີຕໍ່ການເຕີບໃຫຍ່ຂະຫຍາຍຕົວ ຂອງທຸລະກິດໂດຍການປັບປຸງສະພາບແວດລ້ອມດ້ານລະບຽບກົດໝາຍ, ຫຼຸດຜ່ອນຕົ້ນທຶນການຄ້າ ແລະ ຍົກລະດັບຄວາມສາມາດການແຂ່ງຂັນຂອງພາກທຸລະກິດ.